In 2020, chuir Fondúireacht Europeana a creideamh san éagsúlacht in iúl go sainráite ina ráiteas eagraíochtúil ‘go dtugann an oidhreacht chultúrtha cumhacht dúinn glacadh lenár n-éagsúlacht agus borradh a chur fúithi’. Chun an creideamh sin a fhíorú, táimid ag obair chun a chinntiú go léirítear éagsúlacht agus cuimsitheacht san iliomad réimsí dár gcuid oibre - ó na sonraí a bhailímid go dtí na scéalta a inseoimid, na himeachtaí a eagraímid agus na pobail a chothaímid. Ní mór dúinn oibriú go dian agus an t-am is gá a thógáil chun níos mó bealaí a fhiosrú chun a chinntiú go bhfuilimid ag glacadh leis an éagsúlacht agus ag cur bearta praiticiúla i bhfeidhm chun í a leabú inár n-eagraíocht.
Is iomaí gné a bhaineann leis an éagsúlacht agus leis an gcuimsitheacht. Is féidir linn smaoineamh, mar shampla, faoi aois, gnéas agus gnéaschlaonadh, féiniúlacht inscne, eitneacht, reiligiún, tír thionscnaimh nó chónaithe, cumas nó míchumas. Agus nuair a labhraímid faoin gcuimsitheacht agus ionadaíocht á déanamh againn ar obair earnáil na hoidhreachta cultúrtha, aithnímid freisin an éagsúlacht i réimsí, idir bheag agus mhór, idir phríobháideach agus phoiblí, idir leabharlann agus chartlann, iarsmalann agus eile.
Mar eagraíocht neamhspleách, fostaíonn Fondúireacht Europeana os cionn 60 ball foirne de níos mó ná 20 náisiúntacht, a bhfuil a n-oidhreacht shaibhir féin ag gach ceann acu. Tá freagracht orainn plé agus próisis a stiúradh a chuirfidh feabhas ar ár dtuiscint agus ar chur chun cinn na héagsúlachta agus na cuimsitheachta laistigh den eagraíocht.
Ár gcur chuige
Cé go rabhamar i bhFondúireacht Europeana tiomanta i gcónaí ár dtuiscint ar an éagsúlacht agus cur chun cinn na héagsúlachta a mhéadú, tá go leor fós le déanamh agus leanaimid orainn ag foghlaim agus ag forbairt mar eagraíocht.
Deich mbliana ó shin, dhíríomar ar éagsúlacht na bhfearann laistigh d’earnáil na hoidhreachta cultúrtha a thabhairt le chéile, ar chabhrú le músaeim, gailearaithe, leabharlanna agus cartlanna labhairt lena chéile agus ar shaincheisteanna a roinneann siad a aithint agus a láimhseáil.
Thar na blianta, reáchtáileamar feachtais phoiblí amhail Europeana Migration, a bhí mar chuid dár gceiliúradh ar Bhliain Eorpach na hOidhreachta Cultúrtha, lena gcuirtear chun cinn ról dearfach na himirce i stair shaibhir na hEorpa.
Níos déanaí, thosaíomar ag cur le Mí Staire na mBan le blaganna, dánlanna agus taispeántais ar ár suíomh gréasáin bailiúcháin agus ar ár séasúr ar Mhná sa Chultúr agus sa Teicneolaíocht ar ár suíomh gréasáin gairmiúil. Ó thaobh eagrúcháin de, tá beartas ‘Gan bhean, gan phainéal’ againn do bhaill foirne ar tugadh cuireadh dóibh a bheith i láthair ag imeachtaí.
Leanfaimid ar aghaidh leo sin, agus le tionscnaimh eile, amhail an éagsúlacht agus an chuimsitheacht a dhéanamh ina ngné leanúnach dár straitéis don eagarthóireacht a chuirimid ar fáil (féach, mar shampla, Ag Fás Aníos Dubh agus Bród in Europeana: Dragqueens Victeoiriacha). Agus táimid ag féachaint ar conas is féidir linn aghaidh a thabhairt a thuilleadh ar an raon saincheisteanna a bhaineann le héagsúlacht agus cuimsitheacht, go háirithe éagsúlacht na gcúlra eitneach, a bhfuil feasacht orthu ag méadú i gcónaí mar gheall ar ghníomhartha domhanda na gluaiseachta Black Lives Matter.
Ba mhaith linn a chinntiú go dtuigimid, go ndéanaimid ionadaíocht agus go gcuimsímid ár sochaí ar fad san obair a dhéanaimid. Tógfaidh sé seo am. Ach ba mhaith linn a bheith trédhearcach faoin áit a seasaimid mar eagraíocht, agus conas is féidir linn oibriú le chéile chun dul chun cinn a dhéanamh.
An chéad rud eile a dhéanfaimid
Beidh an éagsúlacht agus an chuimsitheacht ar cheann de na tosaíochtaí i bPlean Gnó Fhondúireacht Europeana do 2021 ionas gur féidir linn a bheith trédhearcach agus cuntasach as ár ngníomhaíochtaí.
Cuirfimid ár bhfoireann inmheánach éagsúlachta agus cuimsitheachta ar bhonn foirmiúil ionas gur féidir linn a ról inár n-eagraíocht a leabú chun gníomhaíochtaí éagsúlachta agus cuimsitheachta a spreagadh agus a mhéadú.
In éineacht le Comhlachas Líonraí Europeana agus Fóram na gComhbhailitheoirí, forbróimid ceardlanna idir piaraí faoi stiúir saineolaithe i réimse na héagsúlachta agus an chuimsithe ionas gur féidir linn tuiscint níos fearr a fháil ar na dúshláin atá romhainn agus treochlár gníomhaíochtaí a fhorbairt.
Tá súil againn go réiteoidh na céimeanna seo an bealach do níos mó. Leanfaimid dár gcur chuige a bheachtú agus a oiriúnú, agus coinneoimid ar an eolas thú faoinár ngníomhaíochtaí agus faoi na gníomhaíochtaí atá ar na bacáin.
Leanfaimid orainn ag meas ar a chéile, ag caitheamh go cothrom lena chéile, ag aithint ár gcuid botún agus ag foghlaim uathu agus ag súil le muinín a chothú go dtí go bhfuilimid san áit a gcaithfimid a bheith - i riocht ina bhfuil sé de chumhacht againn go léir glacadh le héagsúlacht agus bláthú.