Dwar ir-Riċerka tal-Europeana
Europeana Research Community għandha sħubija ta’ aktar minn 1,400 professjonist u missjoni biex tgħin lill-membri tagħha jiksbu għarfien aktar profond dwar il-ħtiġijiet tar-riċerkaturi u biex tissodisfahom fejn jikkonċernaw l-użu tal-wirt kulturali diġitali. F’konformità mal-appoġġ tal-Europeana għall-istituzzjonijiet tal-wirt kulturali fil-proċess tagħhom ta’ trasformazzjoni diġitali, dawn l-għotjiet tfasslu biex ikomplu jħeġġu l-kollaborazzjoni u l-iskambji transsettorjali bejn il-wirt kulturali u l-istituzzjonijiet tar-riċerka.
Dwar l-għotjiet
Aħna allokajna baġit totali ta’ EUR 25,000 biex ngħinu fl-ippjanar, l-organizzazzjoni u l-eżekuzzjoni ta’ avvenimenti li jlaqqgħu flimkien professjonisti tal-wirt kulturali u riċerkaturi b’għan doppju:
Jiġu indirizzati l-isfidi u l-opportunitajiet relatati mal-użu mill-ġdid tad-data dwar il-wirt kulturali fir-riċerka.
Jipprovdu opportunitajiet ta’ taħriġ biex jinbnew il-kapaċitajiet diġitali tal-professjonisti tal-wirt kulturali involuti fi proġetti ta’ riċerka.
It-tema għall-organizzazzjoni ta' dawn l-avvenimenti hija: Il-Wirt Kulturali Diġitali għax-Xjenza Miftuħa. Suġġetti possibbli jinkludu (iżda mhumiex limitati għal): Data Miftuħa Konnessa (Użabbli), Standardizzazzjoni u Interoperabbiltà, u Drittijiet tal-Awtur (Eċċezzjonijiet għar-Riċerka u l-aħjar prattiki).
Il-proposti jistgħu jindirizzaw il-qasam tal-Wirt Kulturali b’mod ġenerali jew jiffukaw fuq wieħed mill-oqsma speċifiċi tiegħu (bħall-Galleriji, il-Libreriji, l-Arkivji, jew il-Mużewijiet). Jistgħu jindirizzaw ukoll l-isfidi u l-opportunitajiet għal dixxiplini akkademiċi speċifiċi li jużaw il-wirt kulturali diġitali bħala sors għar-riċerka, (pereżempju, l-Arkeoloġija, l-Istorja, il-Lingwistika, l-Istorja tal-Arti u l-Arkitettura). It-tipi ta’ avvenimenti li se jiġu kkunsidrati jinkludu konferenzi, sessjonijiet ta’ ħidma, serje ta’ seminars, skejjel tas-sajf u attivitajiet ta’ taħriġ. Biex nimmassimizzaw l-impatt, qed infittxu b’mod partikolari avvenimenti b’eżiti li jagħtu valur lil udjenza usa’ fit-tul, bħal rapporti, whitepapers, rakkomandazzjonijiet, tutorials ta’ taħriġ jew intervisti bil-vidjo.
L-iskadenza għas-sottomissjonijiet hija l-31 ta’ Ottubru 2019 u l-proġetti rebbieħa se jitħabbru fuq Europeana Pro u l-midja soċjali fl-20 ta’ Novembru 2019.
Biex issir taf aktar dwar l-għotjiet għar-riċerka, inklużi l-eliġibbiltà, it-termini u l-kundizzjonijiet u kif tissottometti l-proposta tiegħek, jekk jogħġbok żur il-paġna tas-sejħa għas-sottomissjonijiet tagħna.