Baineann Oidhreacht i mBaol úsáid as ábhar digiteach uathúil chun iniúchadh a dhéanamh ar na bagairtí - nádúrtha agus de dhéantús an duine - atá os comhair láithreáin oidhreachta ón am ársa go dtí an lá atá inniu ann. Agus leagann sé béim ar an ról is féidir leis an teicneolaíocht dhigiteach a imirt chun cabhrú le hearnáil na hoidhreachta cultúrtha aghaidh a thabhairt ar dhúshláin athchóirithe sa 21ú haois - lena n-áirítear Notre-Dame.
Seo mar a labhair Mariya Gabriel, an Coimisinéir Eorpach um an nGeilleagar Digiteach agus an tSochaí Dhigiteach:
‘Léirigh tine Notre-Dame arís eile gur gá ár n-oidhreacht chultúrtha Eorpach a chaomhnú, a thaifeadadh agus a chosaint. Léiríonn freagairtí ar fud na hEorpa a thábhachtaí atá sé dár saoránaigh agus dár sochaí. Níos mó ná riamh, tá dul chun cinn á dhéanamh againn maidir le leas a bhaint as cumhacht na seirbhísí digiteacha dár n-oidhreacht chultúrtha, ach ní mór dúinn leanúint de bheith ag obair le chéile chun tacú leis an earnáil san iarracht sin.’
Ón Pantheon sa Ghréig go dtí an Stari Most sa Bhoisnia agus sa Heirseagaivéin, agus ó dhóiteán agus ó thuilte, go cogadh agus lorg an duine, rianaíonn an taispeántas stair thrioblóideach roinnt de na láithreáin oidhreachta is íocónaí san Eoraip. Léiríonn a hinneachar uathúil freisin go bhfuil cuid de na freagraí ag earnáil na hoidhreachta cultúrtha cheana féin ar an dúshlán a bhaineann le láithreáin atá i mbaol a chaomhnú agus a athbhunú.
Seo mar a labhair Harry Verwayen, Stiúrthóir Feidhmiúcháin Europeana:
‘Cuimsíonn ár músaeim, ár gcartlanna agus ár leabharlanna taifid luachmhara, uathúla go minic, ar láithreáin oidhreachta le linn a staire - líníochtaí ailtireachta, grianghraif, pictiúir agus tuairiscí scríofa. Tá eagraíochtaí oidhreachta cultúrtha ag teacht le chéile agus ag glacadh le teicneolaíochtaí nua chun faisnéis faoinár n-oidhreacht a chaomhnú agus a roinnt. Trína mbailiúcháin luachmhara a dhigitiú agus na sonraí a chur ar fáil do shaineolaithe, cabhraíonn siad lenár láithreáin oidhreachta a chosaint. I bhfianaise dhúshláin chasta an lae inniu, is cosúil go bhfuil an cúram níos práinní ná riamh.’
Díríonn caibidil dheiridh an taispeántais ar Notre-Dame de Paris, agus leagann sé béim ar an gcaoi a bhfuil an teicneolaíocht dhigiteach ina cuid lárnach den chomhrá maidir lena hathchóiriú is déanaí - le teicneolaíochtaí amhail scanadh agus samhaltú 3T, agus réaltacht fhíorúil agus bhreisithe, ag gealladh bealaí nua chun cabhrú leis an earnáil an oidhreacht chultúrtha a chaomhnú agus a thaispeáint.
Tugtar cuireadh don phobal cuairt a thabhairt ar an Oidhreacht i mBaol, atá ar fáil ar líne i seacht dteanga, ón 15 Iúil.
GAOLMHARA▼
Teagmháil leis na meáin
Eleanor Kenny - Fondúireacht Europeana
Nótaí d'Eagarthóirí
Tá an taispeántas Heritage at Risk ar fáil ar líne i seacht dteanga - Béarla, Fraincis, Gearmáinis, Iodáilis, Polainnis, Spáinnis agus Rómáinis - ag: https://www.europeana.eu/portal/en/exhibitions/heritage-at-risk
Is féidir íomhánna ón taispeántas atá le húsáid ag na meáin a fháil ag: https://pro.europeana.eu/page/heritage-at-risk
Eolas faoi Europeana
Is é Europeana ardán na hEorpa don oidhreacht chultúrtha dhigiteach agus é mar mhisean aige ‘an domhan a chlaochlú leis an gcultúr’. Is é Europeana Collections leabharlann dhigiteach, músaem, gailearaí agus cartlann na hEorpa. Idir leabhair, ghrianghraif agus phictiúir, chraoltaí teilifíse agus réada 3T, tugann Europeana Collections rochtain ar líne ar stór ollmhór d’ábhar oidhreachta cultúrtha ó gach cearn den Eoraip do chách chun na nithe seo a leanas a aimsiú, a úsáid agus a chomhroinnt: le haghaidh taighde, le haghaidh foghlama, chun rudaí nua a chruthú. (@EuropeanaEU). Is é Fondúireacht Europeana an eagraíocht a gcuireann an Coimisiún Eorpach de chúram uirthi ardán digiteach oidhreachta cultúrtha a fhorbairt don Eoraip.