An Oidhreacht Chultúrtha 70 leathanach: Féachtar sa tuarascáil maidir le Digitiú, Inrochtaineacht ar Líne agus Caomhnú Digiteach ar an dul chun cinn a rinne 28 mBallstát an Aontais idir 2015 agus 2017.
Forbraíodh an moladh go ndéanfaí dul chun cinn a thomhas sa tuarascáil in 2011, agus an fómhar seo, tá comhairliúchán á sheoladh ag an gCoimisiún Eorpach chun é a thabhairt cothrom le dáta. Cuidíonn an moladh le haireachtaí cultúir i ngach ceann de Bhallstáit an Aontais na tosaíochtaí agus na treoracha a leagan síos, agus tacú leis an obair a dhéanann institiúidí oidhreachta cultúrtha ina dtíortha féin.
Tá comhar Eorpach ríthábhachtach chun ár n-oidhreacht chultúrtha a chosaint. Trí oibriú i dtreo an mholta chéanna ar fud na hEorpa maidir leis an gcultúr digiteach, is mó tionchar foriomlán na n-iarrachtaí a dhéanann na Ballstáit in aon réimse ar leith.
Cad atá á dhéanamh ag an gCoimisiún Eorpach?
Tá meastóireacht á déanamh ag an gCoimisiún ar cheann dá phríomhionstraimí beartais maidir le digitiú, rochtain ar líne agus caomhnú digiteach ábhair oidhreachta cultúrtha. Is é an aidhm atá ann tuairimí na bpáirtithe leasmhara a bhailiú – sin tusa – maidir le cé acu is gá nó nach gá an moladh beartais atá ann ó 2011 a thabhairt cothrom le dáta chun riachtanais an phobail a léiriú ar bhealach níos fearr agus chun acmhainneacht oidhreacht chultúrtha na hEorpa a mhéadú ar mhaithe le muintir na hEorpa.
Cén fáth a bhfuil na moltaí á meas?
Deir an treochlár dhá leathanach atá ar fáil go poiblí don mheastóireacht seo, ‘go bhfuil dul chun cinn mór déanta ag an teicneolaíocht agus ag próiseas digitithe na hoidhreachta cultúrtha ó 2011 i leith, agus go bhfuil forbairt tagtha freisin ar earnáil na hoidhreachta cultúrtha.’ Agus go bhfuil meastóireacht á déanamh ar an moladh reatha d’fhonn é a athbhreithniú ‘bunaithe ar na ceachtanna a foghlaimíodh ón meastóireacht agus ó theicneolaíochtaí/treochtaí teicneolaíochta ábhartha nua’.
Luaitear sa treochlár an tine a tharla le déanaí in Notre-Dame de Paris mar léiriú ar a phráinní atá sé ‘an leas is fearr is féidir a bhaint as teicneolaíochtaí digiteacha chun oidhreacht chultúrtha na hEorpa a thaifeadadh, a dhoiciméadú agus a chaomhnú agus chun a n-inrochtaineacht ag saoránaigh na hEorpa a chothú.’ Luaitear ann 3T, sonraí nasctha, mórshonraí agus intleacht shaorga mar réimsí a bhaineann le leas na teicneolaíochta, chomh maith le béim fhéideartha ar shaolré an digitithe a thabhairt cothrom le dáta, impleachtaí chlaochlú digiteach earnáil na hoidhreachta cultúrtha agus iarmhairtí idir an cultúr agus earnálacha eile amhail an turasóireacht.
Comhairliúchán poiblí agus taighde gaolmhar
I mí Dheireadh Fómhair/mí na Samhna, cuirfear tús le comhairliúchán poiblí 12 sheachtain. Mar shuirbhé ar líne, beidh sé ar fáil i dteangacha uile an Aontais agus do gach saoránach trí shuíomh gréasáin an Choimisiúin, agus tríd an leathanach tiomnaithe maidir le beartas cultúir dhigitigh.
Beidh suirbhéanna agus agallaimh ann freisin leis na Ballstáit chomh maith le hinstitiúidí oidhreachta cultúrtha náisiúnta, beaga agus meánmhéide agus ceardlanna le brateagraíochtaí cultúrtha.
Cuirfear san áireamh sa mheastóireacht freisin an tuarascáil a rinneadh le déanaí maidir le dul chun cinn i gcomparáid leis an moladh reatha, Meastóireacht na bliana seo caite ar Europeana, tuarascálacha ENUMERATE a rinneadh le déanaí agus miontuairiscí Ghrúpa Saineolaithe an Choimisiúin um Oidhreacht Chultúrtha Dhigiteach agus Europeana.
Cuirfear an tuarascáil chríochnaitheach bunaithe ar an bhfianaise uile a bailíodh ar fáil ar líne i mí an Mheithimh 2020 agus is dócha go nglacfaidh an Coimisiún an moladh nua i bhfómhar 2020.
Tá do chuid tuairimí tábhachtach
Is mian leis an gCoimisiún Eorpach do thuairimí a chloisteáil. Seo an deis atá agat freagra a thabhairt agus a chinntiú go gcloisfear guth earnáil na hoidhreachta cultúrtha. Coinnigh súil ar Europeana Pro News i mí Dheireadh Fómhair chun nuacht a fháil faoi thús an chomhairliúcháin phoiblí. Idir an dá linn, b’fhéidir gur mhaith leat breathnú ar an treochlár agus tosú ar do fhreagra a mheas mar dhuine aonair agus mar eagraíocht araon.